上次我哋提到「自我關懷」(self-compassion) 呢個概念。原來近年有大量研究顯示，學習「自我關懷」嘅技巧，不單止幫我哋有效去面對自我批評，有效減低抑鬱、焦慮、創傷後壓力等等嘅症狀，並且能加強我哋嘅適應能力、增加生活中嘅快樂同好奇，更能改善人際關係。
咁究竟乜嘢係「自我關懷」？咁我哋就要從Compassion呢個字講起。點為之對人有Compassion呢？試想像你喺路上見到一個跌倒嘅老婆婆，你可能首先留意到佢受傷嘅情況 (aware)，然後你被佢嘅痛苦所觸動 (moved)，跟住你就有咗想去幫佢減輕痛苦嘅願望 (wish to alleviate sufferings)，呢三個反應（覺察 - 觸動 - 想幫助減輕痛苦）就正正係你對老婆婆嘅關懷 (Compassion) 啦。其實自我關懷都係一樣，只不過今次所關懷嘅對象變咗係自己。
近年專注研究自我關懷嘅心理學家Kristin Neff嘗試將自我關懷有系統咁樣分成以下三個範疇：(1) 善待自己，(2) 靜觀當下，同埋 (3) 共通人性。而最大嘅好消息係：無論我哋今日身處乜嘢情況，自覺有冇能力或信心去好好對自己都好，「自我關懷」都係可以學返嚟同埋練返嚟嘅！喺嚟緊嘅post，我哋就會逐一講解呢三大技巧，期望同大家一齊練習，一齊增進自我關懷嘅技巧。
文：Agnes
Comments